Penrhyn Karikari

3/02/08:
Mor wahanol roedd y sefyllfa y bore ma! Derbyn tects am 7.30 y bore yn dweud bod Cymru wedi curo Lloegr yn ngemau'r Chwe Gwlad yn ol ym Mhrydain! Anhygoel!

Gadael Paihia y bore ma ac aros am ychydig yn y pentref agosaf, sef Waitangi - lle hanesyddol yn hanes Seland Newydd gan mai yma arwyddwyd y 'Treaty of Waitangi' - cytundeb rhwng Llywodraeth Prydain a'r Maoris bod cyd-dynnu i fod. Fe'i arwyddwyd gan tua 45 o brif benaethiaid gwahanol lwythau. Roedd yn gytundeb arwyddocaol yn ol yn 1840 ac mae'i sylfaen yn parhau i fod a dylanwad heddiw. Ar ol gweld y ty lle roedd Busby, cynrychiolydd Prydain, yn byw a lle arwyddwyd y cytundeb, fe welsom y Marae ( neuadd gyfarfod) gafodd ei adeiladu i gofio'r canmlwyddiant yn 1940. Mae'n Marae Cenedlaethol ( yn hytrach na'r rhai sydd gan bob llwyth mewn gwahanol ardaloedd o'r wlad) gyda cherfluniadau o benaethiaid tylwythau amrywiol o gwmpas waliau'r Marae.

Mae'r diwrnod yr arwyddwyd y cytundeb yn cael ei gofio bob blwyddyn ar y 6ed o Chwefror, sef dydd Mercher nesaf, ac mae'n ddiwrnod o wyliau cyhoeddus yma.

Gadael Waitangi a gyrru i benrhyn Karikari a chael cinio yn Tokerau. Mynd mlaen i draeth hyfryd Bae Matai ac ymlacio yno am gwpwl o oriau cyn checkio i mewn i gaban ym mharc gwesyllfa Whatuwhiwhi ( Ffa-tw-ffi-ffi, dach chi'n ddeud, gyda llaw!!!) - Lle hyfryd, jyst ger y traeth.

4/02/08:

Gadael Whatuwhiwhi am y dydd a gyrru am begwn gogleddol Ynys y Gogledd, Cape Rienga. Fe gymrodd hi ddwy awr i gyrraedd yno a hanner awr o hopian i lawr llwybr serth i gyrraedd y penrhyn a'r goleudy ar ei ben. Mae'n 6 diwrnod o daith hwylio o fama i Fiji, y tir agosaf.

Mae'r penrhyn yn le sanctaidd yn ngredo'r Maoris. Dyma le mae'r meirw yn croesi drosodd i'r byd arall, yn eu crefydd nhw. Mae'n le arbennig, mor bellenig ac anghysbell - dach chi bron iawn yn teimlo eich bod chi mewn byd arall! Jyst bechod am yr holl fysus a'u cannoedd o dwristiaid sy'n heidio yma fel morgrug drwy'r dydd, - ni yn eu plith!!

Ar ol gyrru nol o'r pegwn, fe fuom yn ymlacio am gwpwl o oriau ar draeth Whatuwhiwhi ger y parc gwersylla.

5/02/08:

Diwrnod o ymlacio oedd heddiw i fod. Mynd i draeth Puheke ar ochr arall y penrhyn ond ar ol rhyw hanner awr, fe ddechreuodd hi bigo bwrw ac fe ddaeth hi'n gawod drom! Nol felly i'r gwersyll a chael diwrnod o ymlacio yno, yn darllen a thorheulo rhywfaint, rhwng y glaw!!

Paihia

2/02/08 - Paihia

Codi'n fore a mynd i lawr i'r dre i ddal cwch hwylio - y Gungha II - cwch 65 troedfedd, ei berchennog, Mike, o Ganada. Roedd o wedi bod yn teithio'r mor am dros 20 mlynedd a'i blant wedi cael eu magu ar y mor, yn gwneud cwrs addysg 'correspondence'. I'w alluogi i wneud hyn, roedd yn treulio 2 fis bob blwyddyn yn gweithio fel pysgotwr yn British Columbia gan ennill digon o gyflog i'w gadw ef a'i deulu drwy'r flwyddyn.

Roedd yn drip da iawn. Fe welsom yr ynysoedd amrywiol cyn stopio am ginio ger un traeth penodol. Fe gafodd Lois a'r lleill gyfle i fynd i'r traeth a cherdded i fyny'r mynydd lle roedd golygfeydd 360 gradd o gwmpas yr ynys a'r lleill o'i gwmpas. Yn y cyfamser, fe es i i kayakio! Ie, kayakio, gredech chi neu beidio! Rhywsut neu'i gilydd, fe lwyddais i shufflo fy mhen ol o gefn y cwch i'r kayak ac fe dreulais rhyw hanner awr yn kayakio o gwmpas yr arfordir oedd yn brofiad hyfryd.

Ar ol i bawb ddychwelyd i'r cwch, a chael y cyfle i fynd i snorklo a nofio, fe gawsom ginio ar ei bwrdd. Fe dreuliasom y pnawn yn torheulo ar y cwch ac yn mwynhau'r golygfeydd ffantastig. Roedd hi'n ddiwrnod gwych - yr haul yn tywynnu ( yn boeth iawn yma heddiw; diolch byth am awel y mor!!) a digon o wynt i chwythu'r hwyliau!

Heibio bar yn Paihia i weld sut wnaeth Cymru yn y NZ International Rugby 7's! Gweld eu bod yn y rownd gyn-derfynol yn erbyn yr Alban i ennill Plat y Collwyr!!! Fe guron nhw'r gwrthwynebwyr o 22 - 12! Roedden nhw wedi bod yn chwarae yn erbyn Fiji a Lloegr yn eu grwp.

Taumarunui i Paihia

31/01/08: Taumarunui i Orewa

Gadael Siwan a'i theulu y bore ma a dechrau ar ein taith hir yn ol i'r gogledd. Gan ei bod wedi bod yn bedair wythnos ers i fi gael y 'moon shoe', dyma benderfynu mynd heibio'r ysbyty yn Taumarunui i weld be di'r sefyllfa. Erbyn hyn, mae'r esgid i ffwrdd a dwi'n gwisgo 'tube' tynn ond dal ar y crutches. Dwi hefyd i fod i ddal i wisgo'r esgid bob hyn a hyn a trio rhoi pwysau ar y droed drwy ddechrau cerdded heb crutches. Mae'n rhyddhad i gael yr esgid i ffwrdd, dim ond am ychydig, ond mae dal yn rhwystredig, gan fy mod yn dal ar un goes, yn ddibynnol ar y crutches, yn methu gyrru ac methu gwneud y rhan fwyaf o bethau!!!! Fe arhosom am ginio yn Te Kuiti a gwthio ymlaen yna am rhyw ddwy awr arall i Huntly. Ar ol paned yno i dorri'r daith, fe aethom ymlaen drwy Auckland a glanio mewn tref glanmor hyfryd o'r enw Orewa. Roedd y lle braidd yn dwristaidd iawn ei naws, ond roedd y traeth 3km o hyd yn brydferth a thawel iawn.

1/2/08 - Mae'n fis Chwefror yn barod.. mae amser jyst yn hedfan! Wel y bore ma, roeddem yn parhau a'n taith ac fe yrrom o Orewa am rhyw dair awr cyn cyrraedd Paihia, tref glanmor arall sy'n ganolbwynt i weithgareddau ar y mor yn bennaf o amgylch yr ynysoedd cyfagos.